Waqt Kaatne Ke Bajaye Khud Ke Saath Waqt Guzaro

Kabhi aap ne ghour kiya hai ke hum kitni baar bas yun hi waqt kaat rahe hote hain? Bus mein baithe hain toh mobile nikaal liya. Train ka intezar kar rahe hain toh kuch dekhna shuru kar diya. Raat ko bistar par letay hain toh phir scrolling shuru. Bas kisi tarah waqt guzar jaye.

Agar kisi se poochho ke bhai kya kar rahe ho toh jawab milta hai, "Kuch nahi yaar, bas time pass kar raha hoon."

Main sochta hoon ke aakhir hum itne bechain kyun rehte hain? Do minute khaali baithna bhi mushkil lagta hai. Har waqt kuch na kuch chahiye hota hai. Kabhi mobile, kabhi TV aur kabhi doston ke saath gup shup. Khamoshi mein baithna toh jaise saza ban gaya hai. 😄

Lekin yaar kabhi kabhi kuch na karna bhi zaroori hota hai.

Mera matlab yeh nahi ke aap har waqt aankhein band kar ke meditation karte rahein ya apni zindagi ka koi bara maqsad dhoondhne lag jayein. Bas kabhi fursat mile toh mobile side par rakh dein. Aaram se baith kar chai piyein. Apne khayalon mein kho jayein aur khud se bhi thori si baat kar lein.

Hum doosron ki baatein sunte sunte aur duniya ke peechay bhaagte bhaagte khud ko toh bilkul hi bhool jate hain.

Mujhe lagta hai ke khaali waqt bhi apni jagah ek nemat hai. Har lamhay ko masroofiyat se bharna zaroori nahi. Kabhi khamoshi bhi bohat kuch sikha deti hai.

Aur waise bhi waqt toh apni raftaar se guzarta rahega. Aaj ka din kal wapas nahi aana. Phir kyun na jo lamhay mil rahe hain unhein bas kaatne ke bajaye thora jee bhi liya jaye?

Agli baar jab bore hon toh foran mobile uthane ke bajaye kuch dair khud ke saath baith kar dekhein. Ho sakta hai aap ko apni hi company achi lagne lage.

Thumbnail: Created with Chatgpt.